0
0
အကြမ်းဖက်စစ်အုပ်စု၏ လူမဆန်သည့် ပိတ်ဆို့မှု၊ ညံ့ဖျင်းပြီး စေတနာခေါင်ပါးသည့် စီမံခန့်ခွဲမှုများ ကြောင့် တိုင်းပြည် ပိုမိုနစ်နာရဟု ပြည်ထောင်စုဝန်ကြီးချုပ်မန်းဝင်းခိုင်သန်းပြောဆို
သံလွင်မြန်မာသတင်း
ဧပြီလ ၃
အကြမ်းဖက်စစ်အုပ်စု၏ လူမဆန်သည့် ပိတ်ဆို့မှု၊ ညံ့ဖျင်းပြီး စေတနာခေါင်ပါးသည့် စီမံခန့်ခွဲမှုများ ကြောင့် တိုင်းပြည် ပိုမိုနစ်နာနေကြောင်း ပြည်ထောင်စုဝန်ကြီးချုပ်မန်းဝင်းခိုင်သန်းပြောဆိုသည်။
ယမန်နေ့ ဧပြီလ ၁ ရက်နေ့က ကျင်းပပြုလုပ်ခဲ့သည့် အမျိုးသားညီညွတ်ရေးအစိုးရ၏ ၁၀ / ၂၀၂၅ အစိုးရအဖွဲ့အစည်းအဝေးတွင် ၎င်းက ထည့်သွင်းပြောကြားကာ တောင်းဆိုခဲ့ခြင်းဖြစ်သည်။
“ကျွန်တော်တို့ဟာ လက်ရှိအချိန်မှာ လူလုပ်တဲ့ဘေး၊ သဘာဝ ဘေး (၂) ခုလုံးကို တပြိုင်နက် ခံစား နေကြရချိန်ဖြစ်တာမို့ အလွန်ခက်ခဲတဲ့အချိန်အခါလို့ပဲ ပြောရမှာ ဖြစ်ပါ တယ်။ ကျွန်တော်တို့ရဲ့ ပြည် သူတွေဟာ မတ်လ ၂၈ ရက်နေ့က စစ်ကိုင်းမြို့အနီးမှာ ဖြစ်ပွားခဲ့တဲ့ ပြင်းအား (၇.၇) ရှိတဲ့ ငလျင်ကြီး ကြောင့် မကြုံစဖူးဆင်းရဲဒုက္ခတွေကို ခံစားနေကြရပါတယ်။ စစ်ကိုင်း၊ မန္တလေး၊ နေပြည်တော်၊ တောင်ကြီး၊ ပဲခူး အစရှိတဲ့ ဒေသ တွေမှာ လူအသေအပျောက်တွေ၊ အဆောက်အအုံတွေ၊ ပျက်စီးဆုံး ရှုံးမှုတွေ အများအပြား ဖြစ်ပေါ်ခဲ့ပါတယ်။ ဒါ့အပြင် ထိုင်းနိုင်ငံမှာလည်း မြန်မာအလုပ်သမားတွေ အပါအဝင် အသက်ဆုံးရှုံးမှုတွေ ရှိခဲ့တယ်လို့ သိရပါတယ်။” ဟု ပြည်ထောင်စုဝန်ကြီးချုပ် မန်းဝင်းခိုင် သန်းက ပြောကြားသည်။
အမျိုးသားညီညွတ်ရေးအစိုးရ အနေဖြင့် ငလျင်ဖြစ်ပေါ်ပြီး ၃ နာရီအတွင်း အရေးပေါ် အစည်း အဝေး ကို ချက်ခြင်းခေါ်ယူခဲ့ပြီး အရေးပေါ်အခြေအနေ စီမံခန့်ခွဲမှုဆိုင်ရာ ပေါင်းစပ် ညှိနှိုင်းရေးကော်မတီ၏ လုပ်ငန်းစဉ်များကို အမြန်ဆုံးစတင်ရန် စီမံနိုင်ခဲ့ကြောင်း၊ သက်ဆိုင်ရာ ဝန်ကြီးဌာနများအနေဖြင့် လည်း လိုအပ်သည့် လုပ်ငန်းများကို ဌာနအလိုက် အလျင်အမြန်လုပ် ဆောင်နေကြောင်း အသိပေး ထားသည်။
“တကယ်တော့ ဒီလိုသဘာဝဘေးအန္တရာယ်မျိုးဟာ တိုင်းပြည်ပုံမှန်အခြေအနေမှာ ရှိရင်တောင် တော်တော်လေး ဝိုင်းဝန်းကြိုးပမ်းဖြေရှင်းကြရမယ့် သဘာဝဘေးတစ်ခုပဲ ဖြစ်ပါတယ်။ အခုလို အ ကြမ်းဖက်စစ်တပ်က တိုင်းပြည်အာဏာကို မတရားလုယူဖို့ ကြိုးပမ်း နေတဲ့အချိန်၊ တစ်ဘက် မှာ လည်း ပြည်သူ့အာဏာ ပြည်သူ့လက်ဝယ်ပြန်ရောက်ရှိပြီး ခေတ်အဆက်ဆက် ပြည်သူကို ညှဥ်း ပန်းနှိပ်စက်မယ့် စစ်အာဏာရှင်မျိုး မရှိစေရေးအတွက် တော်လှန်ရေးဆင်နွှဲနေရချိန်မျိုးမှာ ဒီလို သဘာဝဘေးအန္တရာယ်ကြုံရတာ နိုင်ငံအတွက် အင်မတန်ဝမ်းနည်းမိပါတယ်။” ဟု ပြည်ထောင်စု ဝန်ကြီးချုပ်မန်းဝင်းခိုင်သန်းက ပြောဆိုသည်။
Covid ကပ်ရောဂါဘေးကာလတွင် မပြည့်စုံသော်လည်း မေတ္တာဖြင့် စီမံဦးဆောင်ပေးခဲ့သည့် အရပ် သားအစိုးရလက်ထက်တွင် ပြည်သူများ၏ ညီညီညာညာ အတူရုန်းကန်ခဲ့မှု၊ အရပ်သားအစိုးရ၏ အမြင်ကျယ်ကျယ်ဖြင့် စိတ်စေတနာထားကာ မှန်မှန်ကန်ကန် ဦးဆောင်ခဲ့မှုတို့ကြောင့် အထိအခိုက် နည်းနည်းဖြင့် ကျော်ဖြတ်နိုင်ခဲ့ကြောင်း၊ ယခုအခါ Covid ကာလတွင် အတူတာဝန်ထမ်းဆောင်ခဲ့ ကြ သည့် ဆေးဘက်ဆိုင်ရာ တာဝန်ရှိသူများ အပါအဝင် Volunteer လုပ်ခဲ့သည့် လူငယ်များ အားလုံး သည် တောတွေတောင်များထဲတွင် နိုင်ငံကို ပြန်လည်ကယ်တင်နိုင်ရန် သေနတ်ကိုင်နေကြ ရမှု၊ ပရဟိတ စိတ်အပြည့်ရှိသူ ပြည်သူအချို့လည်း ထောင်ထဲရောက်၊ ထွက်ပြေးနေရမှုတို့ကြောင့် ကူညီ ကယ်ဆယ်ရေး လုပ်ငန်းများသည် ထင်ထားသည်ထက် ပို၍ အဆုံးအရှုံးများနိုင်ကြောင်း သုံးသပ်ထား သည်။
“ဒါ့အပြင် အကြမ်းဖက်စစ်အုပ်စုရဲ့ လူမဆန်တဲ့ ပိတ်ဆို့မှုတွေ၊ ညံ့ဖျင်းပြီး စေတနာခေါင်ပါးတဲ့ စီမံ ခန့်ခွဲမှုတွေကြောင့်လည်း တိုင်းပြည်ဟာ ပိုမိုနစ်နာအုံးမှာပဲ ဖြစ်ပါတယ်။” ဟု ပြည်ထောင်စုဝန်ကြီး ချုပ်မန်းဝင်းခိုင်သန်းကဆက်လက် ပြောကြားသည်။
အမျိုးသားညီညွတ်ရေး အစိုးရအနေဖြင့် ငလျင်ဒဏ်ကြောင့် လူသေဆုံးမှု၊ ထိခိုက်ဒဏ်ရာရရှိမှု၊ ပျက် စီးဆုံးရှုံးမှု စာရင်းများကို ကောက်ခြင်း၊ စိုးမိုးထိန်းချုပ်နယ်မြေများတွင် ကူညီကယ်ဆယ်ရေး လုပ်ငန်း များ၊ ပြန်လည်နေရာချထားရေးနှင့် ထူထောင်ရေး လုပ်ငန်းများကို အချိန်နှင့် တပြေးညီလုပ်ဆောင် နေကြောင်း သိရသည်။
“ငလျင်ဒဏ်ခံဒေသတွေမှာရှိတဲ့ လူထုအခြေပြုအဖွဲ့အစည်းတွေနဲ့ ပြည်သူတွေကို အချင်းချင်း စာနာ ဖေးမကာ အပြန်အလှန် ကူညီစောင့်ရှောက်ဖို့ မေတ္တာရပ်ခံတာမျိုးတွေကို ဝန်ကြီးတွေအနေနဲ့ သေ သေ ချာချာ ပြောပေးဖို့ လိုအပ်မှာဖြစ်ပါတယ်။ တကယ်တော့ ကျွန်တော်တို့ဟာ ဒီသဘာဝဘေး အန္တရာယ်ကို တနိုင်ငံတည်းနဲ့ ရင်ဆိုင်နိုင်ဖို့ အင်မတန်ခက်ပါတယ်။ ဒါကြောင့် နိုင်ငံတကာ အသိုင်း အဝိုင်းအနေနဲ့ ငလျင် ဒဏ်ခံစားနေရတဲ့ မြန်မာပြည်သူတွေအတွက် ကူညီကယ်ဆယ်ရေးအဖွဲ့တွေနဲ့ လူသားချင်းစာနာထောက်ထားမှု အကူအညီတွေပေးပို့ကူညီဖို့လည်း တိုက်တွန်းဖိတ်ခေါ်ထားပြီး ဖြစ် ပါတယ်။ ဒီအကူအညီတွေဟာ တကယ်လိုအပ်နေတဲ့ ပြည်သူတွေဆီကို အသေအချာ ရောက်ရှိဖို့ ကတော့ အင်မတန် အရေးကြီးပါတယ်။” ဟု ပြည်ထောင်စုဝန်ကြီးချုပ်မန်းဝင်းခိုင်သန်းက ပြောဆို သည်။
ပြည်တွင်းပြည်ပ အဖွဲ့အစည်းများအနေဖြင့် တကယ်ဘေးအန္တရာယ် ကြုံတွေ့နေရသည့် ဒေသများ ကို ကိုယ်တိုင်ကိုယ်ကျသွားရောက် ကူညီပံ့ပိုးခြင်းဖြင့် သမာသမတ်ကျပြီး ထိရောက်သည့် ပံ့ပိုးမှုများ ကို လုပ်ဆောင်နိုင်တဲ့အဖွဲ့များမှ တစ်ဆင့် ပံ့ပိုးကူညီမှုများ ပြုလုပ်မှသာ ထိရောက် အကျိုးရှိမည် ဖြစ် ကြောင်း အသိပေးထားသည်။
“အကြမ်းဖက်စစ်အုပ်စုဟာ ပြည်သူလူထုတရပ်လုံး ဆင်းရဲဒုက္ခတွေများစွာ ကြုံတွေ့ ခံစားရစေတဲ့ ဒီ ငလျင်ဘေးဒဏ်ကို စီမံခန့်ခွဲနိုင်တဲ့ အရည်အချင်းမရှိသလို ကိုင်တွယ် ဖြေရှင်းလိုတဲ့ စိတ်စေတနာ လည်း လုံးဝမရှိပါဘူး။ သူတို့ဟာ ပြည်သူတွေရဲ့ ဒုက္ခကို ကူညီဖေးမဖို့ထက် သူတို့ရဲ့အာဏာကို ဆက် လက်ထိန်းသိမ်းနိုင်ရေးကိုပဲ ဆောင်ရွက်နေတယ်ဆိုတာ အားလုံးလည်း မြင်တွေ့ပြီး ဖြစ်ပါတယ်။” ဟု ပြည်ထောင်စုဝန်ကြီးချုပ်မန်းဝင်းခိုင်သန်းက ပြောကြားသည်။
အမျိုးသားညီညွတ်ရေးအစိုးရအနေဖြင့် ထိုးစစ်အားလုံးကို ၂ ပတ်ကြာ ရပ်တန့်ထားသော်လည်း အ ကြမ်းဖက်စစ်အုပ်စုက လေယာဉ်ဖြင့် ဗုံးကြဲခြင်းများ ဆက်တိုက် လုပ်ဆောင်နေကြောင်း၊ ထိုသို့ လုပ် ဆောင်နေမှုသည် စစ်အုပ်စု၏ ရက်စက်ယုတ်မာမှုကို ပိုပြီး ထင်ရှားစေသည့် အပြင် နိုင်ငံတကာ အ သိုင်းအဝိုင်းတွင်လည်း စက်ဆုပ်ရွံရှာစရာကောင်းသည့် လုပ်ရပ်အဖြစ် ပေါ်လွင်စေကြောင်း၊ ယင်း လုပ်ရပ်မျးကို နိုင်ငံတကာက သိသာမြင်သာရှိစေရန် မီးမောင်းဖိုးပြရန်လိုအပ်ကြောင်း ၎င်းက ဆက် လက်ရှင်းပြသည်။
ငလျင်ဘေးအန္တရာယ်နှင့် နောက်ဆက်တွဲ အခက်အခဲများကို ကျော်လွှားနိုင်ရန် တော်လှန်ရေး အင် အားစုများအားလုံး ပူးပေါင်းဆောင်ရွက်ရန် လိုအပ်ကြောင်း၊ အမျိုးသားညီညွတ်ရေးအစိုးရ အနေဖြင့် တော်လှန်ရေး အင်အားစုများ၊ မဟာမိတ်အဖွဲ့အစည်းများ၊ အရပ်ဖက်အဖွဲ့အစည်းများနှင့် အတူ လက်တွဲ၍ ကူညီကယ် ဆယ်ရေး လုပ်ငန်းများကို အစွမ်းကုန် ပူးပေါင်းဆောင်ရွက်သွားရန် အသင့်ရှိ နေကြောင်း ပြည်ထောင်စုဝန်ကြီးချုပ်က သတင်းစကားပါးထားသည်။
“အကျပ်အတည်းတွေကြားထဲမှာ စိတ်ဓာတ်မကျပဲ တစ်ယောက်နဲ့ တစ်ယောက် အားပေးကူညီပြီး အ တူတကွ ရပ်တည်ကြဖို့တော့ အရေးကြီးပါတယ်၊ တစ်နိုင်ငံလုံးက ပြည်သူတွေ၊ နိုင်ငံတကာက မိတ် ဆွေ တွေဟာ ကျွန်တော်တို့နဲ့အတူ ရှိနေကြတာဖြစ်လို့ ခံနိုင်ရည်ရှိမှုနဲ့ စည်းလုံးညီညွတ်မှုဟာ ဘယ် အရာ နဲ့မှ နှိုင်းယှဉ်လို့ မရပါဘူး၊ ဒီလို ခက်ခဲတဲ့ အခြေအနေတွေကို အတူတကွ ကျော်လွှားရင်း တော်လှန်ရေးကို အမြန်ဆုံး အောင်မြင်အောင် ကြိုးစားကြမှာဖြစ်ပါတယ်၊ တိုင်းပြည်ကို အကောင်း ဆုံး ပြန်လည် တည်ဆောက်ကြပါ့မယ်လို့ သတင်းစကားပါးချင်ပါတယ်၊ ငလျင်ကြောင့် ဖြစ်ပေါ်ခဲ့တဲ့ အဆောက်အအုံ အက်ကြောင်းတွေ၊ မြေလွှာအက်ကြောင်းတွေကြောင့် အဆောက်အဦး ဆက်ပြိုကျ တာတွေ၊ ဆည်မြောင်း တာတမံတွေ ကျိုးပြတ်နိုင်တာတွေနဲ့ ကျန်းမာရေးပြဿနာတွေဟာ နောက် ဆက်တွဲ ငလျင်တွေနဲ့အတူ ဆက်လက်ဖြစ်ပွားနိုင်တာဖြစ်လို့ အထူးသတိထားကြဖို့ တာဝန်ရှိသူတွေ အနေနဲ့ ပြည်သူများကို ထိရောက်တဲ့သတင်းစကားတွေ ဖြန့်ဝေပေးကြဖို့အတွက်လည်း တိုက်တွန်း ချင်ပါတယ်” ဟု ပြည်ထောင်စုဝန်ကြီးချုပ် မန်းဝင်းခိုင်သန်းက ပြောဆိုသည်။
Thanlwin Myanmar Media
