0
0
ငလျင်လှုပ်ခတ်ပြီး ၄ ရက်တာကာလအတွင်း စစ်ကောင်စီက လေကြောင်းတိုက်ခိုက်မှု ၃၂ ကြိမ်အထိ လုပ်ဆောင်ခဲ့ပြီး ပြည်သူ ၅၀ ဦးထက်မနည်းသေဆုံး ၄၉ ဦးထိခိုက်ဒဏ်ရာရ
သံလွင်မြန်မာသတင်း
ဧပြီလ ၂
ငလျင်လှုပ်ခတ်ပြီးနောက် ၄ တာကာလအတွင်း အကြမ်းဖက်စစ်ကောင်စီက လေကြောင်းတိုက် ခိုက်မှု ၃၂ ကြိမ်အထိလုပ်ဆောင်ခဲ့ပြီး ပြည်သူ ၅၀ ဦးထက်မနည်းသေဆုံးကာ ၄၉ ဦး ထိခိုက်ဒဏ်ရာ ရရှိခဲ့ကြောင်း အမျိုးသားညီညွတ်ရေး အတိုင်ပင်ခံကောင်စီ -NUCC က ထုတ်ပြန်သည်။
မြေငလျင်လှုတ်ခဲ့သည့် မတ်လ ၂၈ ရက်နေ့မှ ဧပြီလ ၁ ရက်နေ့အထိ ၄ ရက်တာ ကာလအတွင်း စစ် ကောင်စီက ငလျင်ဘေးပြင်းထန်စွာခံထားရသော စစ်ကိုင်းတိုင်း၊ ချောင်းဦးမြို့နယ်၊ မန္တလေးတိုင်း စဉ့်ကူးမြို့နယ် အပါအဝင် နေရာပေါင်း ၁၁ နေရာကို လေကြောင်းတိုက်ခိုက်မှု ၃၂ ကြိမ်အထိ တိုက် ခိုက်ခဲ့ရာ အရပ်သားပြည်သူ ၅၀ ဦးထက်မနည်း သေဆုံးပြီး ၄၉ ဦး ထိခိုက်ဒဏ်ရာရရှိခဲ့ကြောင်း သိရသည်။
ထိုသို့ ငလျင်ဒဏ်ကြောင့် ထိခိုက်ခံစားနေရသောပြည်သူလူထုအပါအဝင် အရပ်သား ပြည်သူများကို ဦးတည်၍ အကြမ်းဖက်မှုများ ကျူးလွန်နေခြင်းသည် မည်သည့်နည်းနှင့်မျှ လက်ခံနိုင်စရာ အကြောင်း မရှိသောကြောင့် အမျိုးသားညီညွတ်ရေးအတိုင်ပင်ခံကောင်စီ အနေဖြင့် ပြင်းပြင်းထန်ထန် ရှုတ်ချပါ ကြောင်း NUCC ၏ ထုတ်ပြန်ချက်တွင်ဖော်ပြထားသည်။
မတ်လ ၂၈ ရက်နေ့ နေ့လယ်ပိုင်းတွင် စစ်ကိုင်းမြို့နယ်ကို ဗဟိုပြုကာ လှုပ်ခတ်ခဲ့သော အင်အား (၇.၇) အဆင့်ရှိ ပြင်းထန်ငလျင်ကြောင့် ယခုအချိန်အထိ လူပေါင်း ၄၂၀၀ ကျော် သေဆုံးပြီး ဒဏ်ရာရ နေသူ၊ ပျောက်ဆုံးနေသူများလည်း အဆမတန်များပြား လျက်ရှိသကဲ့သို့ အိမ်ထောင်စုပေါင်း သောင်း ချီ အိုးအိမ်မဲ့ဖြစ်ခဲ့ရကြောင်း သိရသည်။
ထိုကဲ့သို့ပြည်သူလူထု ဒုက္ခတွေ့ကြုံနေရသော အခြေအနေတွင် တော် လှန်ရေး အင်အားစုများ အနေ ဖြင့် ထိုးစစ်ကိုရပ်ကာ ကူညီကယ်ဆယ်ရေးလုပ်ငန်းများကို တတ်အား သရွေ့ ဆောင်ရွက်နေသော် လည်း အကြမ်းဖက်စစ်ကောင်စီကမူ ငလျင်ဘေးသင့်ဒေသများအပါအဝင် နိုင်ငံအဝှမ်းမှ အရပ်သား ပြည် သူများနေထိုင်သည့် ရပ်ရွာများ၊ နေရာများကို လေယာဉ်ဖြင့် ဗုံးကြဲခြင်း၊ ထိုးစစ်ဆင် မီးရှို့သတ် ဖြတ်ခြင်းများကို ကျင့်ဝတ်မဲ့ဆောင်ရွက်လျက်ရှိကြောင်း အသိပေးထားသည်။
နိုင်ငံတကာအနေဖြင့်လည်း သဘာဝဘေးဒဏ်သင့်ကာလအတွင်းတွင်ပါမရှောင် အကြမ်းဖက်မှုများ ကျူးလွန်လျက်ရှိသော အကြမ်းဖက်စစ်ကောင်စီကို နှုတ်အားဖြင့် ကန့်ကွက်တားဆီးရုံမျှ မက လက် တွေ့အားဖြင့်လည်း အရေးယူဆောင်ရွက်သင့်ပြီဖြစ်ကြောင်း ၊ အထူးသဖြင့် အကြမ်းဖက်စစ်ကောင် စီ၏ လေကြောင်းတိုက်ခိုက်မှုများ ခြွင်းချက်မရှိ အမြန်ဆုံးရပ်တန့်နိုင်ရေး ပူးပေါင်းဆောင်ရွက် ပေး ကြပါရန် အမျိုးသားညီညွတ်ရေး အတိုင်ပင်ခံကောင်စီက တိုက်တွန်းထားသည်။
Thanlwin Myanmar Media
