0
0
“စစ်ကောင်စီရဲ့ အာဏာသိမ်းမှု နောက် ဆက်တွဲ အကျိုးဆက်တွေကို ပြည်သူတွေဟာ လိုသည်ထက် ပိုပြီး အမြောက်အမြား ခံစားနေကြရတယ်ဆိုတာ တွေးမိပြီး၊ ခံပြင်းမိ” ဟု ယာယီသမ္မတ ဒူဝါလရှီးလ ပြောဆို
သံလွင်မြန်မာသတင်း
ဧပြီလ ၂
“စစ်ကောင်စီရဲ့ အာဏာသိမ်းမှု နောက် ဆက်တွဲ အကျိုးဆက်တွေကို ပြည်သူတွေဟာ လိုသည်ထက် ပိုပြီး အမြောက်အမြား ခံစားနေကြရတယ်ဆိုတာ တွေးမိပြီး၊ ခံပြင်းမိ” ကြောင်း ယာယီသမ္မတ ဒူဝါလရှီးလ ပြောကြားသည်။
ယမန်နေ့ ဧပြီလ ၁ ရက်နေ့က ကျင်းပပြုလုပ်ခဲ့သည့် အမျိုးသားညီညွတ်ရေးအစိုးရ၏ ၁၀ / ၂၀၂၅ အစိုးရအဖွဲ့အစည်းအဝေးတွင် ၎င်းက ထည့်သွင်းပြောကြားခဲ့ခြင်းဖြစ်သည်။
“မန္တလေးနဲ့ စစ်ကိုင်းကို ဗဟိုပြုပြီး လှုပ်ခတ်သွားတဲ့ စစ်ကိုင်းပြတ်ရွေ့ငလျင်ကြီးဟာ ရှမ်းပြည်နယ် တောင်ပိုင်း အထိပါ ရိုက်ခတ်မှု ကြီးမားခဲ့တာတွေ့ရပါတယ်။ ဒီငလျင်ကြီးတဲ့ သက်ရောက်မှုဟာ ပြည် သူလူထုရဲ့ အသက်ပေါင်း သောင်းဂဏန်းလောက်အထိ သေကြေပျက်စီးနိုင်တယ်လို့ ပညာရှင်တချို့ က ခန့်မှန်း ကြတာတွေ့ရပါတယ်။ ဒါ့အပြင် နိုင်ငံရဲ့ ဂျီဒီပီ ၇၀ % လောက်အထိ သက်ရောက်မှု ရှိနိုင် တယ်လို့ ခန့်မှန်းကြတာလည်း တွေ့ရပါတယ်။ အဓိက ကတော့၊ ပြန်မရနိုင်တော့တဲ့ ပြည်သူလူထုရဲ့ အသက်တွေ ဖြစ်ပါတယ်။”
စစ်ကိုင်းနှင့်မန္တလေးမြို့တို့သည် နိုင်ငံ၏ မြို့ကြီးများဖြစ်ပြီး နှစ်ပေါင်းရာချီ သက်တမ်းရှိသည့် သမိုင်း ဆိုင်ရာ အမွေအနှစ် ၊ ဘာသာရေး ဆိုင်အမွေအနှစ်များ တည်ရှိရာနေရာများဖြစ်ကြောင်း ၂၀၂၅ ခုနှစ် စစ်ကိုင်း ပြတ်ရွေ့ငလျင်ကြီးသည် ၂၀၀၈ ခုနှစ်က ဖြစ်ပွားခဲ့သည့် နာဂစ်မုန်တိုင်းအပြီးနောက်ပိုင်း တွင် နိုင်ငံအတွက် အဆိုးရွားဆုံးနှင့် အပြင်းထန်ဆုံးသော သဘာဝကပ်ဘေးကြီးဖြစ်ကြောင်း ၎င်းက ဆက်လက်ပြောကြားသည်။
“ငလျင်ဘေးဒဏ်ကို ခံစားရတဲ့ ပြည်သူတွေရဲ့ မျက်ရည်တွေနဲ့ ဝမ်းနည်းပူဆွေးမှုတွေကို ကျွန်တော့် အနေနဲ့ ထပ်တူ ခံစားဝမ်းနည်းမိပါတယ်။ တစ်ဖက်မှာလည်း စစ်ကောင်စီရဲ့ အာဏာသိမ်းမှု နောက် ဆက်တွဲ အကျိုးဆက်တွေကို ပြည်သူတွေဟာ လိုသည်ထက်ပိုပြီး အမြောက်အမြား ခံစားနေကြရ တယ် ဆိုတာ တွေးမိပြီး၊ ခံပြင်းမိတာတွေလည်း ရှိပါတယ်။ ဒီစစ်အာဏာရှင်စနစ်ဆိုးကို အမြန်ဆုံး မချေမှုန်းနိုင်သရွေ့၊ ပြည်သူလူထုခံစားရတဲ့ ဒုက္ခတွေဟာ တတိတိနဲ့ တစိမ့်စိမ့် ခံစားနေရသလို ဖြစ် နေမယ်လို့ ယူဆပါတယ်။”
ပြည်သူလူထုသည် သဘာဝကပ်ဘေး အပါအဝင် လူလုပ်ကပ်ဘေးကြောင့် ရှင်သန်နေရသည့် ဘဝ သည် အင်မတန် အဖြစ်ဆိုးလွန်းလှပြီး အမျိုးသားညီညွတ်ရေးအစိုးရအဖွဲ့ဝင်များအနေဖြင့် လူထု အကျိုးကို လက်တွေ့ ကာယကံမြောက် ဆောင်ကြဉ်းနိုင်ရန် အရေးအကြီးဆုံးဖြစ်ကြောင်း၊ “ဘာကူ နိုင်သလဲ၊ ဘာစွမ်းနိုင်သလဲ” ဆိုတာ လက်တွေ့ပြသရန် လိုကြောင်း တိုက်တွန်းပြောဆိုထားသည်။
ယခုဖြစ်ပျက်သွားသည့် စစ်ကိုင်းပြတ်ရွေ့ ငလျင်ဘေးဒဏ်သင့်ပြည်သူလူထုကို ကူညီကယ်ဆယ်ရေး လုပ်ငန်းများ လုပ်ရန်အတွက် အကန့်အသတ် ရှိနိုင်ကြောင်း၊ အထူးသဖြင့် စစ်ကောင်စီအနေဖြင့် ယင်း ဒေသများကို ထိန်းချုပ်ထားနိုင်သေးသည့်အတွက် အမျိုးသားညီညွတ်ရေးအစိုးရအနေဖြင့် ပြန် လည်ထူထောင်ရေး လုပ်ငန်းစဉ်များ လုပ်နိုင်ရန် အဟန့်အတားများ ကြုံတွေ့နေရကြောင်း အသိပေး ထားသည်။
“ဘယ်လိုပဲ အကန့်အသတ်တွေ ရှိနေသည်ဖြစ်စေ ကျွန်တော်တို့ဟာ တိုက်ရိုက် လုပ်လို့ မရတာတွေ ကို – indirect နည်းနဲ့ လုပ်ဖို့ ကြိုးစားရမှာဖြစ်ပါတယ်။ ကျွန်တော်တို့အစိုးရမှ တာဝန်ရှိ ဝန်ကြီးများ အနေဖြင့် အင်အားပြင်း ငလျင်သင့်ပြည်သူများများကို မရပ်မနား ကူညီထောက်ပံ့ဖို့ ကြိုးပမ်းနေကြ တာ သိရှိပြီးဖြစ်ပါတယ်။ ဆက်လက်ပြီး ကျွန်တော်တို့အတူ အားစိုက်ကူညီနိုင်ဖို့ တိုက်တွန်းလိုပါ တယ်။” ဟု နိုင်ငံတော်ယာယီသမ္မတ ဒူဝါလရှီးလက ပြောကြားသည်။
ငလျင်ဘေးဒဏ်သင့် ပြည်သူလူထုအတွက် ကူညီပေးသည့် သက်ဆိုင်ရာ နိုင်ငံတွေနဲ့ အဖွဲ့အစည်း များကို အထူး ကျေးဇူးတင်ကြောင်း ၊ နိုင်ငံတကာအထောက်အပံ့များသည် အောက်ခြေပြည်သူလူထု ဆီကို အဖိတ်အစင်မရှိဘဲ ပြည့်ပြည့်ဝဝ တိုက်ရိုက် ရောက်ရှိနိုင်သည်ဟု အထူး မျှော်လင့်ကြောင်း၊ အလှူရှင်နိုင်ငံများအနေဖြင့်လည်း အလေးအနက်ထားလိမ့်မည်ဟု ယုံကြည်ကြောင်း ၎င်းက ဆက် လက်ပြောဆိုသည်။
“လောလောဆယ်အားဖြင့် ကူညီကယ်ဆယ်ရေးအတွက် ကျွမ်းကျင်ပညာရှင်တွေနဲ့ နိုင်ငံတကာ နိုင်ငံ ကြီးတွေကနေ အလျင်အမြန် ကူညီပေးတဲ့အတွက် ကျွန်တော်တို့ အမျိုးသားညီညွတ်ရေး အစိုးရက အထူး ကျေးဇူးတင်ကြောင်း ပြောချင်ပါတယ်။ သဘာဝဘေးအန္တရာယ်တွင်းထဲ ကျရောက်နေတဲ့ မြန် မာပြည်သူလူထုတွေဟာ စစ်အာဏာရှင် စနစ်ဆိုးက ဖန်တီးလိုက်တဲ့ လူလုပ်ကပ် ဘေးကြီးနဲ့လည်း ကြုံတွေ့နေကြောင်း၊ နိုင်ငံတကာနိုင်ငံ အသီးသီးကို လက်တွေ့ မျက်မြင် သိစေချင် ပါ တယ်။ အထူး သဖြင့် အကြမ်းဖက် စစ်ကောင်စီက နေ့စဉ် မရပ်မနား ဗုံးကြဲတိုက်ခိုက်နေတာ တွေဟာ ပြည်သူတစ် ရပ်လုံး ခံစားနေရတဲ့ လူလုပ်ကပ်ဘေးတစ်ခုလို ဖြစ်နေတာကို မေ့ထားလို့ မရပါဘူး။” ဟု နိုင်ငံတော် ယာယီသမ္မတ ဒူဝါလရှီးလက ပြောဆိုသည်။
Thanlwin Myanmar Media
