0
0
ပန်းတောင်းမြို့နယ်၊ ညောင်ကျိုးတိုက်ပွဲမှ စစ်သား ၁ ဦး ထွက်ပြေးလာပြီး အလင်းဝင်၊ ညောင်ကျိုး တိုက်ပွဲ၌ စစ်တပ်၏ လေယာဉ်ဖြင့် ဗုံးကြဲချမှု၊ AA ၏ တိုက်ခိုက်မှုများကြောင့် စစ်သား ၁၂၀ ကျော် သေဆုံးဟု ဝန်ခံထွက်ဆို
သံလွင်မြန်မာသတင်း
မတ်လ ၁၈
ပဲခူးတိုင်း၊ ပြည်ခရိုင်၊ ပန်းတောင်းမြို့နယ်၊ ညောင်ကျိုးတိုက်ပွဲအတွင်းမှ စစ်သား ၁ ဦး ထွက်ပြေးလာ ပြီး အလင်းဝင်ခဲ့ကြောင်းနှင့် ညောင်ကျိုးတိုက်ပွဲတွင် စစ်တပ်၏ လေကြောင်းဖြင့်ဗုံးကြဲတိုက်ခိုက်မှု၊ AA ၏ တိုက်ခိုက်မှုများအတွင်း စစ်သား ၁၂၀ ကျော်သေဆုံးခဲ့သည့်ဟု ဝန်ခံထွက်ဆိုထားကြောင်း မြေအောက်ပြောက်ကျားတပ်ဖွဲ့ -အုတ်ဖိုထံမှ သိရသည်။
မတ်လ ၁၆ ရက်နေ့က ပန်းတောင်းမြို့နယ်၊ ညောင်ကျိုးရွာတိုက်ပွဲမှ ထွက်ပြေးလာသော စစ်ကောင် စီ တသ နန်းလင်းသူသည် သာယာဝတီ ခရိုင် တပ်ရင်း ၃၈ဝ၂ တပ်ခွဲ ၄ မြေအောက်ပြောက်ကျား တပ် ဖွဲ့-အုတ်ဖိုထံ လက်နက်မဲ့ အလင်းဝင်ရောက်လာခဲ့ခြင်းဖြစ်ကြောင်း ၊ထိုသို့ အလင်းဝင်ရောက်ခဲ့ပြီး နောက် ကြုံတွေခဲ့ရသည့် ညောင်ကျိုးတိုက်ပွဲနှင့်ပတ်သက်၍ ပြန်လည် ပြောခဲ့ခြင်းဖြစ်ကြောင်း သိရ သည်။
“သန္ဓေစစ်သားက နည်းပါတယ်။ တပ်ရင်းတစ်ရင်းမှာ သန္ဓေစစ်သားဆိုလို့ လေးငါးယောက်ပဲပါတယ်။ ကျန်တာက ပြည်သူ့စစ် စစ်မှုထမ်းတွေချည်း။ သူတို့ပေါ်တာဆွဲထားတဲ့လူတွေ။ ဟိုဘက်က (AA) ကျ တာ သိပ်မရှိဘူး။ စစ်ကောင်စီဘက်ကပဲ အကျများတယ်။ ဟိုဘက်ကတက်လာရင်လည်း အင်အား အလုံးအရင်းနဲ့” ဟု ကိုနန်းလင်းသူက ပြောဆိုခဲ့ကြောင်း သိရသည်။
အလင်းဝင်ရောက်ခဲ့သူ နန်းလင်းသူသည် ကြို့ပင်ကောက်မြို့နယ်၊ ငှက်ကြီးသိုက်အုပ်စု၊ ရေပြန်စိန်ရိုး ကြီးရွာ၌ ၂၀၂၄ ခုနှစ်၊ စက် တင်ဘာလ ၁၈ ရက်နေ့က ပေါ်တာဆွဲ ဖမ်းဆီးခံရကာ ခမရ ၆ တိမ်မြုပ် တပ်အတွင်းသို့ ခေါ်ဆောင်ခံခဲ့ရကြောင်း၊ ထိုမှ တစ်ဆင့် သံဖြူဇရပ်မြို့နယ်၊ ဝဲကလိ အမှတ် ၄ တပ်မ တော် တန်းမြှင့်လေ့ကျင့်ရေးကျောင်းသို့ ပို့ဆောင်ခံခဲ့ရကာ စစ်မှုထမ်း အပတ်စဥ် ၆ သင်တန်း တက် ရောက်ခဲ့ရကြောင်း သိရသည်။
ညောင်ကျိုးတိုက်ပွဲတွင် စစ်ကောင်စီတပ်သား အင်အား ၂၀၀ ခန့် ပါဝင်ခဲ့သော်လည်း ပြန်ဆုတ်ခွာ လာစဉ် အင်အား ၇၀ ခန့်သာ ကျန်ရှိတော့ကြောင်း၊ ကျန် ၁၃၀ အနက် ၁၀၀ ကျော်မှာ သေဆုံးကာ အချို့ကို အာရက္ခတပ်တော်က ဖမ်းဆီးသွားကြောင်း၊ ဆုတ်ခွာလာသည့် အင်အား ၇၀ တွင်လည်း အများစုမှာ ဒဏ်ရာရရှိထားပြီး ၂၀ ခန့်မှာ ပြင်းထန်ဒဏ်ရာများဖြင့် ပြည်မြို့နှင့် ရွှေတောင်မြို့ကြားရှိ ကုတင် ၁၀၀ စစ်ဆေးရုံ၌ ဆေးကုသမှုခံယူနေရကြောင်း သိရသည်။
ယခုနှစ် ဇန်နဝါရီလကုန်တွင် မိုးထိတောင်ကို AA ဦးဆောင်သော တော်လှန်ရေးပူးပေါင်းများ သိမ်း ပိုက်ရသွားပြီးနောက် ညောင်ကျိုးတိုက်ပွဲသည် ဖေဖော်ဝါရီလဆန်းပိုင်းက စတင်ခဲ့ကာ မတ်လ ၁၂ ရက်တွင် တော်လှန်ရေးတပ်များက အပြီးသတ်သိမ်းပိုက်နိုင်ခဲ့ခြင်းဖြစ်သည်။
အလင်းဝင်ရောက်ခဲ့သူ ကိုနန်းလင်းသူသည် တော်လှန်ရေး ရဲဘော်များနှင့် ပူးပေါင်းကာ အကြမ်းဖက် စစ်တပ်ကို ပြန်လည် တိုက်ခိုက်သွားမည်ဖြစ်ကြောင်း အသိပေးထားသည်။
ပြည်သူလူထုကို နည်းမျိုးစုံဖြင့် ဒုက္ခပေးနေသော အကြမ်းဖက် စစ်ကောင်စီ တပ်သားများ အပါအဝင် ပေါ်တာဆွဲ ဖမ်းဆီးခံရပြီး စစ်မှုထမ်း နေရသည့် စစ်မှုထမ်း တပ်သားသစ်များအနေဖြင့် အမြန်ဆုံး အလင်းဝင်ကြရန်နှင့် တော် လှန်ရေး တပ်ဖွဲ့ထံ လက်နက်နှင့်အတူ အလင်းဝင်ရောက်လာပါက ထိုက်ထိုက် တန်တန် ဆုချီးမြင့်သွားမည်ဖြစ် ကြောင်း သာယာဝတီခရိုင် တပ်ရင်း ၃၈၀၂ တပ်ခွဲ ၄ မြေအောက်ပြောက်ကျားတပ်ဖွဲ့-အုတ်ဖိုက အသိပေး ထုတ်ပြန်ထားသည်။
Thanlwin Myanmar Media
