0
0
ကဗျာကဏ္ဍ “တွဲလက်ခိုင်စေ အိုအဆွေ”
ပျိုးကြဲလက်
သေမင်းမျက်လုံး ၊ အမှောင်ဖုံးသော်
စစ်ရှုံးလူယုတ် ၊ ဉာဏ်ရည်ဆုတ်၍
ကိုယ်နှုတ်စိတ်ကြမ်း ၊ ရမ်းချေပြီ ။
တရားစောင့်နတ် ၊ အရှင်မြတ်လည်း
သေနတ်ကျည်ခ ၊ ဇီဝိန်ကြွ၍
ဒီပဇမ္ဗူ ၊ သွေးပွတ်ဆူ၏ ။
မကောင်းသူပယ် ၊ ကောင်းသူကယ်မည့်
အဘယ်သိကြား ၊ ကိုလေထွားပင်
လူကြားမျက်မြင် ၊ မပြသာပြီ ။
ရိုးရာနတ်မွန် ၊ သုံးဆယ့်ခွန်ဟု
တံခွန်ထောင်လွှား ၊ ကိုယ်တော်များက
ဘုံကားပြာပုံ ၊ ကြောက်ဒူးတုန်၏ ။
ဝိဇ္ဇာထိုရ်ကမ်း ၊ အထက်လမ်းမှ
ယောင်ယမ်းမန်းမှုတ် ၊ ဂါထာစုတ်လည်း
လူယုတ်မနိုင် ၊ ဘိုးတော်မှိုင်ပြီ ။
အောက်လမ်းမဟာ ၊ မှော်ဆရာလည်း
ပြေးဟာပြေးဟ ၊ ပြေးလိုက်ကြဟု
ဂနိုင်တောကြား ၊ စစ်ရှောင်ရှား၏ ။
တော်လှန်ကြပေ ၊ အိုအဆွေတို့
အခြေကောင်းကောင်း ၊ မကောင်းကောင်းလျှင်
စိတ်ထောင်းကိုယ်ကြေ ၊ မဖြစ်လေနှင့်
လက်တွေတွဲထား ၊ အောင်စိတ်ပွားလျက်
လူအားငွေကူ ၊ တာဝန်ယူ၍
ကိုယ်ထူကိုယ်ထ ၊ ကိုယ်စီကြွလော့
နိုးကြထကြ ၊ ဖေးမကြလော့
ထကြကြွကြ ၊ ပုန်ကန်ကြလော့
တိုက်ကြခိုက်ကြ ၊ နှိမ်နင်းကြလော့ ။
ပျိုးကြဲလက်
ကဗျာရေးသားချိန် = ၂၀၂၂ ခုနှစ်၊ စက်တင်ဘာလ ၄ ရက် ည ၉ နာရီ ၁၃ မိနစ်
Thanlwin Myanmar Media
