0
0
ကဗျာကဏ္ဍ “ငါ့ရွှေခွက်ပြန်ပေး”
ပျိုးကြဲလက်
သေရိဝဇာတ်ဝယ် ဘုရားအလောင်းတော်ရယ်က
ပေါင်းဖော်ကာ ဒေဝဒတ်နဲ့
ခြေထပ်မကွာ ရွဲကုန်ထမ်းကာဖြင့်
တစ်လမ်းဝင် တစ်လမ်းထွက်
မပျက်မကွက် ရွာစဥ်ဝင်လို့
ရွဲလိုချင် လာခင်ဗျဝယ်ခင်ဗျဆိုပြန်တော့
အမယ်အို တဲအိုပျက်က
ခပ်သွက်သွက် ထွက်ကာကြို ။
အဖွားရင်နှစ် မြေးအချစ်ပေမို့
ရွဲတန်ဆာသစ် လဲလှယ်ကာဝတ်စေတော့ရယ်လို့
ဆွဲလာပေါ့ ရွှေခွက်အိုကိုဖြင့်
မောင့်အလိုကျ စျေးဖြတ်ကာပေးခဲ့ပါတော့
ကြေးစနဲ့ရွှေစင် မကွဲပြားတဲ့ဘဝပင်မို့
ဒေဝဒတ်လျင် သခင်မှတ်ကာဖြင့်
နှင်းအပ်လို့ကို ။
ဟန်ဆောင်ကာ ရွာကိုပတ်ပါလို့
ဒေဝဒတ်ရဲ့လောဘ အတောရယ်ကမသတ် နိုင်ပေဘု
မအပ်မရာ ရွှေခွက်မဟာကိုလ
စျေးနှိမ်ကာ ရချင်ဇောရယ်နဲ့
မောဟရယ်ပို ညစ်ပြန်သကိုဟန်ပြပြေးပြန်တော့
ကလေးအရွယ် မြေးငယ်ကငို
ရွဲတန်ဆာကို လိုချင်လို့ပူဆွေး ။
အလောင်းတော် သစ္စာနှောပါလို့
အမှန်ပြောကာ စျေးဖြတ်ဝယ်ပြီမို့
လီဆယ်သူ တစ်ကျော့ပြန်အလာမှာဖြင့်
သံသရာ လမ်းတစ်ကွေ့မှာလ
စံစရာ နန်းမတွေ့ပြီမို့
အပြန်တစ်ရာ ရမ်းမဟေ့ရယ်လို့
ရွာဝင်လမ်းအကွေ့ လူစုံခိုက်မှာပ
တမင်မိုက်သကို ဘဝင်လှိိုက်ဖိုသည်းခြေပျက် ပြန်တော့
(အလိုကွယ်) ငါ့
ရွှေခွက်ပြန်ပေး ။ ။
ပျိုးကြဲလက်
ကဗျာရေးသားချိန် = ၂၀၂၁ ခုနှစ်၊ ဇန်နဝါရီလ ၈ ရက် ည ၁၁ နာရီ ၃၀ မိနစ်အချိန်
Thanlwin Myanmar Media
