0
0
ကဗျာကဏ္ဍ “ခွင့်လွှတ်ပါအမေ”
ပျိုးကြဲလက်
မွေးသမိခင် ၊ ကျေးဇူးရှင်အား
ဝေဟင်ပေါ်က ၊ ဗုံးကြဲချ၍
သတ်ကြသည်ကို ၊ သားမောင်ငိုလျှက်
အပိုမထွက် ၊ မပြောရက်ပါ
အသက်တမျှ ၊ သားချစ်ရသည့်
အမေရယ် ။
မေ့ရွာသတင်း ၊ ကြားကြားချင်းဝယ်
စိတ်တွင်းမီးတောက် ၊ လူစိတ်ပျောက်ပြီး
စိတ်ဖောက်ခဲ့ရာ ၊ ဒေါသပါ၍
သားမှာကွာတား ၊ ချခံထားလျှက်
ပါးနားပူဆဲ ၊ သတိဆွဲကာ
လွှဲရိုက်ခံရပြီးပါပြီ ။
အမေ့အသက် ၊ သတ်ဖြတ်ရက်သည့်
လက်မရွံ့တပ် ၊ ဗုံးချအပ်သူ
လေတပ်တော်တွင်း ၊ သူငယ်ချင်းလည်း
မျက်ကွင်းဟောက်ပက် ၊ အိပ်ရေးပျက်၍
ငိုရက်ရှည်ရပါပြီအမေ ။
သူတို့ရွာက ၊ သူ့နှမနှင့်
တူမတသင်း ၊ သားတပ်ရင်းက
ရွာတွင်းပေါင်းစု ၊ စစ်ကြောင်းပြု၍
မုဒိမ်းကျင့်လျှက် ၊ ဘဝဖျက်ကာ
သက်မဲ့ခန္ဓာ ၊ ဝတ်ဗလာဖြင့်
သေချာမလွဲ ၊ အရှက်ခွဲလျှင်
ငိုပွဲဆင်တာ ၊ နေ့တိုင်းပါအမေ ။
ကြည်းရေလေတပ် ၊ အမှားထပ်ကာ
ပေးဆပ်ရာဝယ် ၊ ဆွေမျိုးလှယ်ပြီး
တကယ်သတ်ခါ ၊ ရက်စက်တာဖြင့်
စိတ်မှာမပျော် ၊ ကမ္ဘာကျော်၍
လာခေါ်ပါတော့ ၊ သေချင်ပေါ့ ။
သားတို့ဆွေမျိုး ၊ သူနှင့်တိုးသို့
သူ့မျိုးသူ့ဆွေ ၊ သားကြောင့်သေပြီ
အမေခွင့်လွှတ်နိုင်ပါစေ ။
ပျိုးကြဲလက်
ကဗျာရေးသားချိန် = ၂၀၂၄ ခုနှစ်၊ နိုဝင်ဘာလ ၈ ရက် ၀၀ နာရီ ၅၀ မိနစ်
D Day News
