0
0
ရေဦးမြို့မ ရဲစခန်းကို ဒရုန်းဖြင့် ဗုံးကျဲ တိုက်ခိုက်မှု စစ်ကောင်စီ တပ်သား ၄ ဦး သေဆုံးပြီး ရဲလိုင်းခန်း မီးလောင်ပျက်စီး
D Day News
အောက်တိုဘာလ ၃
စစ်ကိုင်းတိုင်း၊ ရေဦးမြို့မရဲစခန်းကို ဒရုန်းဖြင့် ဗုံးကျဲ တိုက်ခိုက်ခဲ့ရာ အကြမ်းဖက်စစ်ကောင်စီ တပ်သား ၄ ဦး သေဆုံးပြီး ရဲလိုင်းခန်း မီးလောင်ပျက်စီးခဲ့ကြောင်း ရွှေဘိုခရိုင်အမှတ် ၁၄ တပ်ရင်း ရေဦး PDF ထံက သိရသည်။
ယမန်နေ့ အောက်တိုဘာလ ၂ ရက်နေ့ မွန်းလွဲ ၂ နာရီ ၃၀ မိနစ်ခန့်တွင် ရေဦးမြို့မ ရဲစခန်းအတွင်းသို့ ရွှေဘိုခရိုင်အမှတ် ၁၄ တပ်ရင်း ၊ ရေဦးPDF မှ Fixed Wing Drone များဖြင့် ဗုံးသီး ၆ လုံးကျဲချ တိုက် ခိုက်ခဲ့ခြင်းဖြစ်ကြောင်း သိရသည်။
ထိုသို့ တိုက်ခိုက်မှု အတွင်း ရဲစခန်းအတွင်းနေထိုင်သူ Informer သန်းနိုင်၏ လိုင်းခန်းပေါ်ကို ဗုံးသီး များ ကျရောက်ပေါက်ကွဲခဲ့ပြီး အကြမ်းဖက် စစ်ကောင်စီ တပ်သား ၄ ဦး ပွဲချင်းပြီးသေဆုံးကာ ၆ ဦး အပြင်းအထန် ဒဏ်ရာရရှိခဲ့ကြောင်း၊ ထို့အပြင် ယင်းလိုင်းခန်းလည်း မီးလောင် ပျက်စီးခဲ့ကြောင်း သိရသည်။
အဆိုပါ တိုက်ခိုက်မှုအပြီးတွင် အကြမ်းဖက် စစ်တပ်ဘက်က လက်နက်ကြီး၊ လက်နက်ငယ်များဖြင့် ရမ်းသန်း ပစ်ခတ်သော်လည်း ပြည်သူ့ကာကွယ်ရေးရဲဘော်များ အထိအခိုက်မရှိ ဆုတ်ခွာနိုင်ခဲ့ ကြောင်း သိရသည်။
D Day News
