0
0
အကြမ်းဖက်စစ်တပ် ဒုတိယခေါင်းဆောင်စိုးဝင်းနှင့် အရှေ့တောင်တိုင်းစစ်ဌာနချုပ် တိုင်းမှူးတို့ အစည်းအဝေးပြုလုပ်နေစဉ် ဒရုန်းဖြင့် ဗုံးကြဲတိုက်ခိုက်
D Day News
ဧပြီလ ၈
မွန်ပြည်နယ်၊ မော်လမြိုင်မြို့ရှိ အရှေ့တောင်တိုင်း စစ်ဌာနချုပ်အတွင်း၌ အကြမ်းဖက်စစ်တပ် ဒုတိယ ခေါင်းဆောင် စိုးဝင်းနှင့် အရှေ့တောင်တိုင်းစစ်ဌာနချုပ်တိုင်းမှူးတို့ အစည်းအဝေးပြုလုပ်နေစဉ် ဒရုန်း ဖြင့် ဗုံးကြဲတိုက်ခိုက်ခဲ့ကြောင်း Alpha Bats Drone Force တပ်ဖွဲ့ထံက သိရသည်။
ယနေ့ ဧပြီလ ၈ ရက် ညနေ ၅ နာရီ ၁၀ မိနစ်ခန့်က မော်လမြိုင်မြို့ရှိ အရှေ့တောင်တိုင်းစစ်ဌာနချုပ် (ရတခ) တိုင်းရုံးအတွင်း အကြမ်းဖက် စစ်တပ် ဒုခေါင်းဆောင် စိုးဝင်းနှင့်အဖွဲ့နှင့် တိုင်းမှူးတို့ စစ်ဆင်ရေး ကွပ်ကဲမှု အစည်းအဝေးလုပ်နေစဉ် Fixed Wing Drone များဖြင့် ဗုံးကျဲတိုက်ခိုက်ခဲ့ခြင်းဖြစ် ကြောင်း သိရသည်။
ထိုသို့ ဗုံးကြဲတိုက်ခိုက်မှုကြောင့် ဒုချုပ်စိုးဝင်းနှင့်အရှေ့တောင်တိုင်းတိုင်းမှူးတို့ အစည်းအဝေးကျင်းပမှု ချက်ချင်းရပ်ဆိုင်းသွားပြီး အကြမ်းဖက်စစ်တပ် ဒုတိယခေါင်းဆောင်စိုးဝင်းမှာ ဖော်ကာ တစ်စီး၊ ဂျက်ဖိုက်၂ စီးဖြင့် ချက်ချင်းပြန်ပြေးသွားကြောင်း သိရသည်။
အဆိုပါ တိုက်ခိုက်မှုကို ရှာထူးဝေါ်နည်းပညာတပ်ဖွဲ့ ၏ Alpha bats တပ်ခွဲက မြေပြင်လုံခြုံရေးပူးပေါင်းတပ်များ အကူအညီဖြင့် တိုက်ခိုက်ခဲ့ခြင်းဖြစ်ကြောင်း သိရသည်။
“ဒီကနေ့ညနေပိုင်းက မော်လမြိုင်မှာ ပေါက်ကွဲသံတွေ ဆက်တိုက်ကြားရတယ်လို့ ဒေသခံတွေက လည်း အတည်ပြုပါတယ်။ ပေါက်ကွဲမှုကြောင့် ရတခ တိုင်းအတွင်း တုန်လှုပ်ခြောက်ခြားမှုတွေဖြစ် တယ်။ လေယာဥ်တွေ၊ ကားတွေ၊ လုံခြုံရေးတွေ အထူးပြင်ဆင်တာတွေ့ရတယ်။ လှုပ်လှုပ်ခတ်ခတ် ဖြစ်ခဲ့သွားခဲ့တာ၊ အထိအခိုက် အသေးစိတ်တော့ မသိရသေးဘူး” ရှာထူးဝေါ်နည်းပညာတပ်ဖွဲ့ Alpha Bats တပ်ခွဲက ပြောကြားသည်။
မော်လမြိုင်မြို့ အရှေ့တောင်တိုင်းစစ်ဌာနချုပ်- ရတခ တွင် စိုးဝင်းရောက်နေသကဲ့သို့ ဘားအံ တပ်မ ၂၂ တွင်လည်း ညွန့်ဝင်းဆွေရောက်နေကြောင်း၊ မြဝတီ၊ သင်္ဃန်းညီနောင်ဘက်သို့ လေကြောင်းထိုး စစ်ရေးများ ပြုလုပ်ရန် ကြံစည်နေကြခြင်းဖြစ်ကြောင်း သိရသည်။
D Day News
