0
0
ကဗျာကဏ္ဍ “ရဲဘော်ထွန်းသာ လိုက်ခဲ့ပါ”
ပျိုးကြဲလက်
ရဲဘော်ထွန်းသာ ၊ လိုက်ခဲ့ပါကွ
တို့ရွာတကြော ၊ ရေစုန်မျော၍
ပြာတောထဲမှာ ၊ ပျောက်ရရှာပြီ
လာပါငါတို့ ၊ ကာကွယ်စို့ ။
ပျော်ခင်းဝေဆာ ၊ မင်းတို့ရွာနှင့်
ဝေဆာရှုမော ၊ ငါ့ရွာကြောကို
တိမ်ကောမည့်ဟန် ၊ ပြည်ဖျက်ရန်က
ခုခံနှိမ်နင်း ၊ ထူထောင်ရင်းဖြင့်
သက်နှင်းပေးဆပ် ၊ မှန်ရာရပ်မည်
စစ်တပ်သိက္ခာ ၊ ဆည်ပါစို့ ။
အာဏာယစ်မူး ၊ ခေါင်းဆောင်ရူးတို့
ခူးဆွတ်ခြေမွ ၊ ဖျက်ဆီးကြ၍
ဒုက္ခဝေသီ ၊ ငါတို့ပြည်နှင့်
စစ်သည်ရဲမက် ၊ ပြည့်ခြေလက်များ
ပျက်ခဲ့ရပြီ ၊ ထွန်းသာညီရေ့ ။
အတွေးသက်သက် ၊ ရွာမဖျက်နှင့် ။
အငေးသက်သက် ၊ မြို့မဖျက်နှင့် ။
အဆွေးသက်သက် ၊ ပြည်မဖျက်နှင့် ။
ဆွေးချိန်ငေးချိန် ၊ တွေးဆချိန်နှင့်
မှေးချိန်မရှိ ၊ လူ့ငတိကို
အသိစိတ်ဝင် ၊ လက်ငင်းပယ်၍
ကာကွယ်ကြမည်၊ ငါ့တို့ပြည် ။
ဒေသစုံလင် ၊ ပြည့်ရင်ခွင်က
ဘဝင်အေးစူး ၊ လက်နက်ချလျှင်
ပျော်ကြပါးကြ ၊ ကြင်နာစွ ။
အလံဖြူပြ ၊ လက်နက်ချ၍
ဒေသအကျိုး ၊ ပြည့်အကျိုးကို
ဆတိုးထမ်းရွက် ၊ ငါတို့လက်နှင့်
ပြည်ဖျက်ရန်စွယ် ၊ အသွယ်သွယ်ကို
ဖယ်ရှားပါစို့ သူငယ်ချင်း ။ ။
ပျိုးကြဲလက်
ကဗျာရေးသားချိန် = ၂၀၂၄ ခုနှစ်၊ ဒီဇင်ဘာလ ၂၉ ရက် ညနေ ၃ နာရီ ၅၈ မိနစ်
Thanlwin Myanmar Media
