0
0
ကဗျာကဏ္ဍ “နေချိုချိန်”
ပျိုးကြဲလက်
သူသာသွေးပြောင် ၊ စွန့်စားယောင်ဖြင့်
ခေါင်းဆောင်လူညစ် ၊ စည်းစိမ်ယစ်သော်
စစ်သားမယား ၊ တဖားဖားနှင့်
စစ်သားအမေ ၊ တပေပေတည့် ။
မွေးသည့်ကလေး ၊ ပြည့်ရင်သွေးလည်း
လူမွှေးမပြောင် ၊ စစ်ခေါင်းဆောင်ကား
သားမောင်ဂုဏ်ကြီး ၊ ချစ်သမီးတို့
စီးပွားဥစ္စာ ၊ ပညာရှာရန်
နေရာမရှား ၊ နိုင်ငံခြားထိ
ဆီးတာမရှိ၊ ပို့ဆောင်ဘိ ။
နောက်တန်းရဲမေ ၊ မတွေဝေနှင့်
အနေကျပ်ကျပ် ၊ အသေထပ်၍
ကြားညှပ်ရဘိ ၊ လင်ငတိကို
စိတ်ရှိလက်ရှိ ၊ စည်းရုံးဘိလော့ ။
တပ်ဆွေတပ်မျိုး ၊ အခြေဆိုးအောင်
သွေးထိုးမြှောက်ပင့် ၊ မပြုသင့်ဘဲ
ချင့်ချိန်နှိုင်းဆ ၊ လမ်းမှန်ပြ၍
နှမအမ ၊ ဒေါ်ကြီးဘထွေး
ညီကအစ်ကို ၊ သားချင်းဆိုက
အိုနာသေဘေး ၊ မကျသေးခင်
ဖေးမယူငင် ၊ ပြည့်ရင်ခွင်သို့
အလျှင်ရောက်စေ၊ ပို့ပါလေ ။
တို့မြို့တို့ရွာ ၊ တို့ပြည်သာ၌
အာဏာရှင်ယုတ် ၊ အမြန်ပြုတ်မှ
အဟုတ်ဧကန် ၊ ငြိမ်းချမ်းရန်ဟု
မှန်မှန်ပေါင်းစု ၊ ဝန်းရံပြုလော့ ။
အနုအကြမ်း ၊ နိုင်ရာထမ်းလျှက်
စိတ်ဝမ်းမကွဲ ၊ ပုန်ကန်ပွဲသို့
ဝင်နွှဲချဉ်းကပ် ၊ မှန်ရာရပ်၍
တပ်တွင်းတပ်ပြင် ၊ ပေါင်းဆန့်ကျင်က
နေဝင်ချိန်က နီးချေပြီ ။ ။
ပျိုးကြဲလက်
ကဗျာရေးသားချိန် = ၂၀၂၄ ခုနှစ်၊ ဒီဇင်ဘာလ ၁၇ ရက် ညနေ ၆ နာရီ ၅၁ မိနစ်
Thanlwin Myanmar Media
