0
0
ကဗျာကဏ္ဍ “တော်လှန်သစ္စာ”
ပျိုးကြဲလက်
တိမ်ပိုးချည် လွှာရုံပျက်ကယ်နဲ့
လှရက်ပါ့ လစန္ဒာ ။
မိုးယံမှာ ကိုယ်ရောင်ဝင်း
မင်းထိန်ထိန်သာ ။
တောင်တန်းနှင့် လဝါဝါ
ညပုံလွှာ တင့်ထူး ။
အိမ်လွမ်းမောင် လရောင်ဆမ်းက
တမ်းတလို့ရူး ။
ဝါးနှီးဖြာ ကွပ်ပျစ်ခင်းကွယ့်
တောင်ခြေရင်း စခန်းသာ ။
ခါတရံ ထန်းလက်ထိုးလို့
ကပ်မိုးကပ်ကာ ။
တော်လှန်ဆဲ ကာလမှာ
နေရတာ အခြေဆိုး ။
ဂျီးမများပေါင်
မီးတအားလောင် ပြည့်သောကကို
တိုးထမှာစိုး ။
ပြည့်မေတ္တာ ပြည့်ဒါနကိုလ
ဝေမျှလို့ စေတနာပို ။
လူထုမှာ ထောက်ပံ့ပေး
ချွေးနဲစာကို ။
မွေးနေ့နှင့် အလှူဆို
ရသာပို ရှိသား ။
အခွင့်မသာ ကြမ္မာကင်းရင်ဖြင့်
ထမင်းခြောက်စား ။
ပုလဲသွယ် မျက်ရည်စက်ကိုလ
ကွယ်ဝှက်လို့ တိုက်ပွဲဝင် ။
လူထုပင် အံကိုခဲလို့
ငိုပွဲတွေဆင် ။
စနစ်ဆိုးရဲ့ ဒဏ်ရာထင်
ရင်နှင့်အမျှ ခံစားရ ။
ပြည်သူတွေ မျက်ရည်ကျအောင်
ဆိုးပါ့ယုတ်ပါ့ ။
လစန္ဒာ ရောင်ဝါနုကို
သစ္စာပြု တိုင်တည် ။
အာဏာရှင် အမျိုးယုတ်
ပြုတ်စေရမယ် ။
ထိုးခုတ်လို့ ရန်ပယ်
အန္တရာယ် အလီလီဖယ်ရှား ။
ရွှေမြေမှာ ဘယာဝေးလို့
အေးကြစေသား ။ ။
ပျိုးကြဲလက်
၂၀၂၄ ခုနှစ်၊ ဇူလိုင်လ ၁၈ နံနက် ၅ နာရီ ၅ မိနစ်
