0
0
စစ်ကိုင်းမြို့နယ်၊ အုန်းတောရွာ အမှတ် ၆၀၀၅ တင့်ကားတပ်ရင်းကို ဒရုန်းဖြင့် ဗုံးကျဲတိုက်ခိုက်
D Day News
ဇူလိုင်လ ၂၈
စစ်ကိုင်းတိုင်း၊ စစ်ကိုင်းမြို့နယ်၊ အုန်းတောရွာရှိ အမှတ် ၆၀၀၅ တင့်ကားတပ်ရင်းအတွင်းသို့ ဒရုန်း ဖြင့် ဗုံးကျဲတိုက်ခိုက်ခဲ့ကြောင်း Phoenix Sagaing တပ်ဖွဲ့ထံမှ သိရသည်။
ဇူလိုင်လ ၂၆ ရက်နေ့က စစ်ကိုင်းမြို့နယ်၊ အုန်းတောရွာရှိ အကြမ်းဖက်ကောင်စီတပ် အမှတ် ၆၀၀၅ တင့်ကား တပ်ရင်းကို Fixed Wing Drone များဖြင့် ဗုံးသီး ၉ လုံး ကျဲချ တိုက်ခိုက်ခဲ့ရာ အကြမ်းဖက် စစ်များနှင့် ၎င်းတို့နေထိုင်ရာ အဆောက်အအုံများကို ထိခိုက်ပျက်စီးမှုရှိပြီး အကြမ်းဖက် စစ်သားများ ဘက်မှ လက်နက်ကြီး၊ လက်နက်ငယ်များဖြင့် ရမ်းသမ်းပစ်ခတ်မှုရှိခဲ့ကြောင်း သိရသည်။
“စခတွေဘက် ထိခိုက်မှုပဲရှိတာ သေဆုံးတာမရှိဘူး၊ ဗုံးသီးက ၉ လုံးချတာ၊ ၄ လုံးလောက်ပဲ ပစ်မှတ် ကို ထိတယ်၊ အဆောက်အအုံကတော့ သူတို့တပ်ထဲက လူပျိုဆောင်ပေါ်တစ်လုံးကျတယ်လို့ သတင်း ရတယ်။ သူတို့ဘက်ကလက်နက်ကြီးကတော့ ၂ လုံးပြန်ပစ်တယ်၊ လက်နက်ငယ်ကတော့ အချက်ရေ တော်တော်များများပြန်ပစ်တာရှိပါတယ်” ဟု Phoenix Sagaing တပ်ဖွဲ့မှ တာဝန်ရှိသူတစ်ဦးကပြော ကြားသည်။
အဆိုပါ တိုက်ခိုက်မှုကို Phoenix -Sagaing ၊ Young Wolf (LPDF) ၊ Unicorn Guerrilla Force ၊ Royal Falcon Guerrilla Force၊ ကြောင်လက်သည်း (ဝက်လက်)နှင့် နယ်မြေခံ တော်လှန်ရေး အင်အားစုများ ပူးပေါင်းကာ ဆောင်ရွက်ခဲ့ခြင်းဖြစ်ပြီး ပြည်သူ့ကာကွယ်ရေးတပ်ဖွဲ့ဝင်များအထိ အခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရသည်။
D Day News
