0
0
ကဗျာ ကဏ္ဍ “တော်လှန် ကလောင်ရှင်”
ပျိုးကြဲလက်
သင့်မြေသင့်ယာ ၊ သင့်မြို့ရွာတွင်
ဘယာမဲ့ကင်း ၊ လွတ်လပ်ခြင်းနှင့်
ကွေကွင်းမှောင်မိုက် ၊ ရှိသည့်ခိုက်ဝယ်
တိုက်ပွဲချင်းထပ် ၊ မှန်ရာရပ်၍
မကပ်မခို ၊ လုံ့လပိုလျှက်
ပြည်ကိုအေးချမ်း ၊ဘေးမသန်းအောင်
စွမ်းဆောင်နိုင်ပါစေ။
တိရိစ္ဆာန်မျိုး ၊ ရန်သူဆိုးတို့
ကိုယ်ကျိုးသာကြည့် ၊ ပြည်ကိုဖိသော်
သူ၏အမျိုး ၊ ခွန်အားကိုးက
စိုးမိုးသာလွန် ၊ ခွန်အားမွန်ဖြင့်
အားသွန်ဖိ၍တိုက်။
လက်သည်းအားကိုး ၊ သူ့အမျိုးလည်း
စိုးမိုးသာလွန် ၊ လက်သည်းမွန်ဖြင့်
အားသွန်ဖိ၍တိုက်။
အစွယ်အားကိုး ၊ သူ့အမျိုးလည်း
စိုးမိုးသာလွန် ၊ အစွယ်မွန်ဖြင့်
အားသွန်ဖိ၍တိုက်။
အဆိပ်အားကိုး ၊ သူ့အမျိုးလည်း
စိုးမိုးသာလွန် ၊ အဆိပ်မွန်ဖြင့်
အားသွန်ဖိ၍တိုက်။
လက်နက်အားကိုး ၊ သူ့အမျိုးလည်း
စိုးမိုးသာလွန် ၊ လက်နက်မွန်ဖြင့်
အားသွန်ဖိ၍တိုက်။
လက်ယာလက်ထဲ ၊ ကလောင်စွဲက
ပြည်ထဲအရေး ၊ အခါပေးလျှင်
မနှေးချင့်ကဲ ၊ သင့်လက်ဝဲဖြင့်
ဓါးဆွဲထွက်ကာ ၊ ရင်ဆိုင်ပါလော့။
ကလောင်ထက်ထက် ၊ ဓားထက်ထက်ဖြင့်
ပြည်ဖျက်ရန်စွယ် ၊ သင်တို့ပယ်မှ
နောင်ဝယ်ငြိမ်းချမ်းမည်တကား။ ။
ပျိုးကြဲလက်
ကဗျာရေးသားချိန် = ၂၀၂၄ ခုနှစ်၊ ဇန်နဝါရီလ ၁၅ ရက် မွန်းလွဲ ၂ နာရီ ၂၁ မိနစ်
D Day News
