0
0
မတ္တရာမြို့နယ်၊ တံငါဂိတ်စစ်တပ်စခန်းနှင့် စစ်ကြောင်းကို ဗုံးကြဲ ပစ်ခတ်တိုက်ခိုက်မှု စစ်သား ၃ ဦး ဒဏ်ရာရ (ရုပ်သံ)
D Day News
ဇွန်လ ၃
မန္တလေးတိုင်း၊မတ္တရာမြို့နယ်၊ တံငါဂိတ်စစ်တပ်အထိုင်စခန်းနှင့် စစ်ကြောင်းကို ဗုံးကြဲ ပစ်ခတ် တိုက်ခိုက်ခဲ့ကြောင်း SSTF – People Police ထံမှ သိရသည်။
ယမန်နေ့ ဇွန်လ ၂ ရက် နံနက် ၅ နာရီ မိနစ် ၅၀ အကြိမ်တွင် SSTF – People Police လှုပ်ရှား တပ်ဖွဲ့ ထိန်းချုပ် နယ်မြေ အတွင်းသို့ အင်အား ၇၀ ခန့်ဖြင့် စစ်ကြောင်း ထိုးဝင်ရောက်လာသော အကြမ်းဖက်စစ်သားများအား စောင့်ကြို ပစ်ခတ်တိုက်ခိုက်ခဲ့ရာ နံနက် ၆ နာရီ မိနစ် ၃၀ အချိန်မှ ၁၁ နာရီ မိနစ် ၅၀ အချိန်အထိ ကြာမြင့်ခဲ့ကြောင်း သိရသည်။
ယင်းတိုက်ခိုက်မှုအတွင်း အကြမ်းဖက်စစ်သား ၃ ဦး အပြင်းအထန်ဒဏ်ရာရရှိကာ မွန်းလွဲ ၂ နာရီ ၂၅ မိနစ်အချိန်တွင် အကြမ်းဖက်စစ်တပ်စစ်ကြောင်းမှာ ပြန်လည် ဆုတ်ခွာသွားကြောင်း သိရသည်။
အဆိုပါတိုက်ပွဲအတွင်း မိတ်ဖက်အဖွဲ့များဖြစ်သည့် မတ္တရာမြို့နယ် ပကဖ မှ အကြမ်းဖက်စစ်တပ် အထိုင်စခန်းဖြစ်သည့် တံငါဂိတ်ကို Drone ဗုံးသီး ဖြင့် ၃ ကြိမ် ဗုံးကြဲတိုက်ခိုက်ခြင်း၊ တိုက်နယ်(၃) ပကဖ အဖွဲ့မှ ပြန်လည်ဆုတ်ခွာသည့် အကြမ်းဖက်စစ်တပ် ယာဉ်တန်းကို မိုင်းဆွဲတိုက်ခိုက်ခြင်း တို့လုပ်ဆောင်ခဲ့ကြောင်း သိရသည်။
D Day News
