0
0
အန္ဒိယနိုင်ငံသည် နိုင်ငံတကာ လူ့အခွင့်အရေးတာဝန်များကို ဗြောင်ကျကျ လျစ်လျူရှုလျက်ရှိပြီး မြန်မာစစ်အုပ်စုထံ လက်နက်ရောင်းချမှု ပိတ်ပင်ရေး ချက်ချင်းအရေးယူ ပြဌာန်းရန်နှင့် စစ်သင် တန်းနှင့် အခြားစစ်ဘက်ဆိုင်ရာ ပံ့ပိုးမှုအားလုံးကို ရပ်ဆိုင်းရန် Justice For Myanmar တောင်းဆို
D Day News
မေလ ၂၀
မြန်မာစစ်အုပ်စုက နိုင်ငံတကာလူ့အခွင့်အရေးနှင့် လူသားချင်းစာနာမှု ဥပဒေများကို ဆိုးဆိုးရွားရွား ချိုးဖောက်မှုများ အကြိမ်ကြိမ်ကျူးလွန်နေဆဲ အခြေအနေကို ကောင်းစွာသိလျက်နှင့် မြန်မာစစ်အုပ် စုကို စစ်လက်နက်များ၊ စက်ပစ္စည်းကိရိယာများ၊ နည်းပညာများနှင့် လေ့ကျင့်သင်ကြားပေးမှုများကို အိန္ဒိယနိုင်ငံက ပေးအပ်ထောက်ပံ့နေကြောင်း Justice For Myanmar က ထုတ်ပြန်သည်။
မြန်မာစစ်အုပ်စုထံ စစ်လက်နက်များ၊ စက်ပစ္စည်းကိရိယာများနှင့် နည်းပညာများ ပေးအပ်ခြင်းဖြင့် အိန္ဒိယနိုင်ငံသည် စစ်အုပ်စု၏ ပြည်သူများအပေါ် အကြမ်းဖက်တိုက်ခိုက်မှုများကို တိုက်ရိုက် ကူညီ ပံ့ပိုးနေခြင်း ဖြစ်ပြီး၊ စစ်ရာဇဝတ်မှုများနှင့် လူသားမျိုးနွယ်အပေါ် ကျူးလွန်သည့် ရာဇဝတ်မှုများကို အားပေးကူညီလျက်ရှိသည်။
အိန္ဒိယ၏ ပြည်တွင်းဥပဒေများသည် မြန်မာနိုင်ငံအတွင်း ရက်စက်ကြမ်းကြုတ်သည့် ရာဇဝတ်မှုကြီး များတွင် အိန္ဒိယနိုင်ငံ၏ ကြံရာပါပတ်သက်မှုကို တားဆီးရန် လုံလောက်မှုမရှိပဲ အိန္ဒိယပို့ကုန်များကို ၁၉၉၂ နိုင်ငံခြားကုန်သွယ်မှု (ဖွံ့ဖြိုးရေးနှင့် စည်းမျဉ်းစည်းကမ်းများ) အက်ဥပဒေနှင့် ဆက်စပ် စည်း မျဉ်းများ၊ နည်းဥပဒေများနှင့် အသိပေးထုတ်ပြန်ချက်များဖြင့် ကြီးကြပ်ကြောင်း၊ အဆိုပါ အက်ဥပဒေ သည် အိန္ဒိယအစိုးရအား ကန့်သတ်ကုန်စည်များ တင်ပို့ရေးအတွက် အခြေအနေများ သတ်မှတ်သည့် နိုင်ငံခြားကုန်သွယ်မှုမူဝါဒ (FTP) တစ်ရပ်ကို အကောင်အထည်ဖော်ရန် ခွင့်ပြုထားကြောင်း သိရသည်။
အဆိုပါ နိုင်ငံခြားကုန်သွယ်မှုမူဝါဒ (FTP)ကို ၂၀၂၃ ခုနှစ်တွင် ထုတ်ပြန်ခဲ့ကြောင်း၊ အိန္ဒိယနိုင်ငံ အနေ ဖြင့် အီရတ်၊ ဆိုမားလီယာ၊ အီရန်၊ မြောက်ကိုရီးယားနှင့် ဗင်နီဇွဲလားနိုင်ငံများသို့ တင်ပို့မှုများအား တားမြစ်ချက်များ ထုတ်ပြန် ထားသော်လည်း မြန်မာနိုင်ငံနှင့် ပတ်သက်၍ထို သို့ထုတ်ပြန်လုပ်ဆောင် ရန် ပျက်ကွက်နေဆဲ ဖြစ်ကြောင်း Justice For Myanmar က အသိပေးထားသည်။
အိန္ဒိယကာကွယ်ရေး PSUs အသီးသီးမှ တင်ပို့သော စစ်လက်နက်နှင့် ခဲယမ်းများသည် အထူးဓာတု ပစ္စည်းများ၊ သက်ရှိများ၊ ပစ္စည်းများ၊ စက်ပစ္စည်းကိရိယာများနှင့် နည်းပညာများ ဆိုသည့် (SCOMET) စာရင်းဇယားအောက်တွင် အကြုံးဝင်ပြီး၊ ယင်းစာရင်းသည် ပို့ကုန်ပါမစ်များ လိုအပ်သည့် ပစ္စည်းများ ကို သတ်မှတ်ဖော်ပြထားကြောင်း၊ လက်ရှိ ပြဌာန်းချက်များတွင် ပို့ကုန်ပါမစ်ထုတ်ပေးရန် ဆုံးဖြတ်ရာ ၌ ထည့်သွင်းစဉ်းစားရမည့် အကြောင်းအရာအနေဖြင့် ပို့ဆောင်မည့်နိုင်ငံအတွင်း လူ့အခွင့်အရေး ချိုး ဖောက်မှုများအကြောင်း တစုံတရာကို ထည့်သွင်းထားခြင်း မရှိကြောင်း သိရသည်။
အိန္ဒိယအနေဖြင့် ၎င်းတို့ တင်ပို့သည့် လက်နက်များသည် မြန်မာလူထုအပေါ် သက်ရောက်မှုကို အသိ အမှတ်ပြုပြီး၊ မြန်မာစစ်အုပ်စုထံ လက်နက်ရောင်းချမှု ပိတ်ပင်ရေး ချက်ချင်းအရေးယူ ပြဌာန်းရန်နှင့် စစ်သင်တန်းနှင့် အခြားစစ်ဘက်ဆိုင်ရာ ပံ့ပိုးမှုအားလုံးကို ရပ်ဆိုင်းရန် Justice For Myanmar က တောင်းဆိုသည်။
ထို့အတူ အိန္ဒိယ ပုဂ္ဂလိကနှင့်အစိုးရကဏ္ဍ စစ်လက်နက်ကုမ္ပဏီများ အနေဖြင့် မြန်မာစစ်အုပ်စုနှင့် တိုက်ရိုက်သော်လည်းကောင်း၊ မြန်မာနိုင်ငံရှိ ရှေ့ထွက်ကုမ္ပဏီများမှ တဆင့်သော်လည်းကောင်း စီးပွားရေးလုပ်ဆောင်ခြင်းကို ချက်ချင်းရပ်တန့်ရန်နှင့် စစ်အုပ်စုထံ နောက်ထပ်စစ်လက်နက်နှင့် ဆက်စပ်ပစ္စည်းများ တင်ပို့ရန် သဘောတူညီထားမှုများအား ရပ်တန့်ထားရန်တို့ကိုလည်း Justice For Myanmar က ဆက်လက်တောင်းဆိုထားသည်။
အိန္ဒိယအစိုးရနှင့် ၎င်း၏စစ်လက်နက်လုပ်ငန်းများနှင့် ထိတွေ့ဆက်ဆံနေသော အစိုးရများနှင့် ကုမ္ပ ဏီများအနေဖြင့် စစ်လက်နက်များ၊ စက်ကိရိယာများနှင့် နည်းပညာများကို စစ်အုပ်စုထံလမ်း ကြောင်းပြောင်း ရောက်ရှိခြင်းမှ ကာကွယ်ရန် တင်ကြိုစီစစ်မှုကို အရေးတကြီး လုပ်ဆောင်သင့် ကြောင်း၊ မြန်မာစစ်အုပ်စု၏ ရက်စက်ကြမ်းကြုတ်သည့် ရာဇဝတ်မှုကြီးများတွင် အိန္ဒိယ၏ ကြံရာပါ ပတ်သက်မှုကို အဆုံးသတ်စေရန် ၎င်းတို့၏ ဩဇာလွှမ်းမိုးမှုကို အသုံးပြုသင့်ကြောင်း Justice For Myanmar က အကြံပြုထားသည်။
စစ်အုပ်စုထံ စစ်လက်နက်နှင့် စက်ပစ္စည်းကိရိယာများ ပံ့ပိုးပေးနေသည့် အိန္ဒိယကုမ္ပဏီအများစုသည် အစိုးရပိုင် အများပြည်သူကဏ္ဍကုမ္ပဏီများ (PSUs) များဖြစ်နေသည့်အချက်က မြန်မာစစ်အုပ်စု၏ ရက်စက်ကြမ်းကြုတ်သည့် ရာဇဝတ်မှုများတွင် အိန္ဒိယအစိုးရ၏ ကြံရာပါပတ်သက်မှုကို ပြသနေ ကြောင်း အသိပေးထားသည်။
စီးပွားရေးနှင့် ဆက်စပ်လုပ်ငန်းများမှ ဖြစ်ပေါ်လာသော လူ့အခွင့်အရေးဆိုးကျိုးများကို ကာကွယ် ရေးနှင့် ဖြေရှင်းရေးအတွက် တစ်ကမ္ဘာလုံး တရားဝင်ကိုးကားရသည့် စီးပွားရေးနှင့်လူ့အခွင့်အရေး ဆိုင်ရာ ကုလသမဂ္ဂလမ်းညွှန်အခြေခံမူများတွင် နိုင်ငံများအနေဖြင့် မိမိတို့ ပိုင်ဆိုင်သည့် သို့မဟုတ် ထိန်းချုပ်ထားသည့် စီးပွားရေးလုပ်ငန်းကြီးများ၏ လူ့အခွင့်အရေးချိုးဖောက်မှုများကို ကာကွယ်နိုင် ရန် အတွက် “ထပ်တိုး” လုပ်ဆောင်သင့်သည်များကို လုပ်ဆောင်ထားရန်ဆက်လက်အသိပေးထား သည်။
လမ်းညွှန်အခြခံမူများတွင် နိုင်ငံပိုင်စီးပွားရေးလုပ်ငန်းတစ်ခု၏ လုပ်ရပ်များသည် နိုင်ငံ၏ လုပ်ရပ် များ အဖြစ် မှတ်ယူနိုင်သည်ဖြစ်ရာ၊ ယင်းနိုင်ငံပိုင်စီးပွားရေးလုပ်ငန်း၏ လူ့အခွင့်အရေး ချိုးဖောက်မှု များ သည် နိုင်ငံအနေဖြင့် ၎င်းလိုက်နာရမည့် နိုင်ငံတကာကတိကဝတ်များအား ချိုးဖောက်ခြင်းဖြစ် ကြောင်း ရှင်းရှင်းလင်းလင်းဖော်ပြထားသည်။
ကုလသမဂ္ဂလူ့အခွင့်အရေးဆိုင်ရာ မဟာမင်းကြီးရုံး (OHCHR) မှ တရားဝင်ရှင်းလင်းထားပြီး ဖြစ် သည့် အတိုင်း အဆိုပါလမ်းညွှန် အခြေခံမူများသည် အဖွဲ့အစည်းများက ရှယ်ယာရှင်အဖြစ် ပါဝင် ဆောင်ရွက်နေသည့် အခြေအနေအပါအဝင် ရင်းနှီးမြှုပ်နှံမှုပုံစံအားလုံးအတွက် ကျင့်သုံးရန် အကျုံး ဝင်ပြီး ယင်းမျှော်မှန်းချက်များသည် OECD ၏ နိုင်ငံစုံစီးပွားရေးလုပ်ငန်းကြီးများအတွက် တာဝန်ယူမှု ရှိသော စီးပွားရေးအမူအကျင့်ဆိုင်ရာ လမ်းညွှန်ချက်များတွင်လည်း ပါရှိကြောင်း သိရသည်။
အဆိုပါစံနှုန်းများသည် စစ်အုပ်စုထံ ထောက်ပံ့နေသည့် အိန္ဒိယကုမ္ပဏီများတွင် ရင်းနှီးမြှုပ်နှံထားသူ များအနေဖြင့် သင့်လျော်သော ထိခိုက်မှုလျော့ပါးရေး အစီအမံများ ဆောင်ရွက်ရန် အဆိုပါကုမ္ပဏီ များနှင့် တွေ့ဆုံမေးမြန်းညှိနှိုင်းရန် လိုအပ်ပြီး ပို့ကုန်များကို ဆိုင်းငံ့ထားခြင်း၊ အရေးယူဆောင်ရွက်မှု မရှိမချင်း အဆိုပါကုမ္ပဏီများမှ ရင်းနှီးမြှုပ်နှံမှုများ နုတ်သိမ်းထားခြင်း၊ သို့မဟုတ် တာဝန်ယူမှုရှိသော ရင်းနှီးမြှုပ်နှံမှု ရုတ်သိမ်းခြင်း သို့မဟုတ် နုတ်ထွက်ခြင်းများ ပါဝင်သည်ဟု ဆိုသည်။
ရင်းနှီးမြှုပ်နှံသူအစိုးရများအနေဖြင့် ၎င်းတို့၏ လူ့အခွင့်အရေးပဋိညာဥ်ပါ လိုက်နာရမည့် တာဝန် ဝတ္တရားများသည် ၎င်းတို့၏ စီးပွားရေးလုပ်ငန်းများအတွက်သာမက ၎င်းစီးပွားရေး လုပ်ငန်းများ၏ သက်ရောက်မှုရှိသော ပြည်သူလူထုအပေါ်တွင်ပါ သက်ရောက်သည်ဖြစ်ရာ OECD လမ်းညွှန်းချက် များအရ ၎င်းတို့အနေဖြင့် သတိထားစောင့်ကြည့်ရမည့် အဆင့်တစ်ရပ် ထပ်တိုးရှိနေခြင်းဖြစ်ကြောင်း Justice For Myanmar က ထုတ်ပြန်ထားသည်။
ကျွန်ုပ်တို့၏ ရှုမြင်မှုအရ ဖြစ်ပေါ်နေဆဲ တရားမဝင်အာဏာသိမ်းကြိုးပမ်းမှုနှင့် ဆိုးရွားလှသည့် လူ့ အခွင့် အရေး အရေးပေါ်အခြေအနေများတွင် စစ်အုပ်စုထံ လက်နက်တင်ပို့နေမှုများကို အလုံးစုံ ရပ် တန့် ရန်မှလွဲ၍၊ အဆိုပါစစ်လက်နက်နှင့် ဆက်စပ်ပစ္စည်းတင်ပို့မှုများ၏ လူ့အခွင့်ရေးဆိုင်ရာ အကျိုး ဆက်များကို လျော့ချရန်မှာ မဖြစ်နိုင်ဟု ဆိုသည်။
ယခုတွေ့ရှိဖော်ထုတ်ထားသည့် ကုမ္ပဏီများရှိ ရင်းနှီးမြှုပ်နှံသူများနှင့် ရှယ်ယာရှင်များအနေဖြင့် မိမိ တို့၏ ရင်းနှီးမြှုပ်နှံမှုနှင့် ရှယ်ယာပိုင်ဆိုင်မှုများက မြန်မာပြည်သူများအပေါ် သက်ရောက်မှုများကို ဆန်းစစ်ရန်နှင့် လျော့ပါးသက်သာစေရေး ဆောင်ရွက်ရန် တို့အတွက် လူ့အခွင့်အရေးဆိုင်ရာ တင်ကြို စီစစ်မှုများကို ထပ်တိုးလုပ်ဆောင်ကြရန် Justice For Myanmar က ထပ်လောင်းတောင်းဆိုထား သည်။
အိန္ဒိယနှင့် အခြားနိုင်ငံအစိုးရများထံမှ ဘဏ္ဍာငွေ၊ စစ်လက်နက်၊ စက်ပစ္စည်းနှင့် လေယာဉ်ဆီ ပံ့ပိုး ကူညီမှုများဖြင့် မြန်မာစစ်အုပ်စုသည် မြန်မာပြည်သူများအပေါ် သုံးနှစ်ကျော်ကြာ အကြမ်းဖက်ခဲ့ပြီး စစ်အုပ်စုထံ အရင်းအမြစ်များ ရောက်ရှိမှုကို ဖြတ်တောက်ရန်နှင့် ဖက်ဒရယ်ဒီမိုကရေစီအတွက် မြန် မာပြည်သူများ၏ ရုန်းကန်လှုပ်ရှားမှုများကို ပံ့ပိုးကူညီရန် နိုင်ငံတကာ အရေးယူဆောင်ရွက်မှုတစ်ရပ် အရေးတကြီး လိုအပ်နေပြီဖြစ်ကြောင်း Justice For Myanmar က ထုတ်ပြန်ထားသည်။
D Day News
