0
0
ကဗျာကဏ္ဍ “တိမ်းရင်းရာဇဂြိုလ်”
ပျိုးကြဲလက်
ဗိမ္ဗိသာရ ၊ မင်းမြတ်မှသည်
ရာဇဂြိုလ်ပြည် ၊ မှန်းဆရည်က ။
အဇာတသတ် ၊ အဖသတ်၍
ခွေးဇာတ်ကိုပြု ၊ အာဏာလုသည် ။
အဖသတ်မင်း ၊ ချေရာနင်းလျက်
မင်းဆက်ငါးလီ ၊ သတ်ချေပြီ ။
နာဂဒါသ ၊ အလှည့်ကျသော်
အဖသတ်မင်း ၊ ပြည်ကတင်း၍
ခံပြင်းထကြွ ၊ မောင်းထုတ်ကြသည်။
နာဂဒါသ ၊ အာဏာရလည်း
အမုန်းများစွာ ၊ ပြည့်ကျိန်စာနှင့်
သစ္စာဆိတ်သုန်း ၊ တိုက်တိုင်းရှုံး၍
နှလုံးမလှ ၊ ပြေးခဲ့ရ၏ ။
နဒီချင်းတွင်း ၊ ဖောင်စုန်ဆင်း၍
အပြင်းနှင်ရာ ၊ အောင်မြေချာဟု
ပညာထက်ဘိ ၊ မြတ်ကဝိတို့
ရွေးသည့်အရပ် ၊ ကျုံးသုံးရပ်နှင့်
နန်းရပ်မြို့ရိုးတည်ခဲ့သည် ။
ထီးသစ်နန်းသစ် ၊ ကြငှန်းသစ်နှင့်
မြို့သစ်စံကာ ၊ စိတ်မသာဘု
သူ့မှာခံစစ် ၊ ရန်သူသစ်တို့
ပတ်ရစ်ဝန်းရံ ၊ စစ်ပြုပြန်သော်
ထပ်မံစစ်ရှုံး ၊ လူညွှန့်တုံးပြီ
ထီးဆုံးနန်းဆုံး ၊ ဘဝဆုံး၏ ။
တိမ်းရင်းရှောင်ရင်း ၊ မြို့ပြခင်း၍
တိမ်းရင်းရာဇဂြိုလ် ၊ အမည်ပိုလျက်
ခေါ်ဆိုမြဲပင် ၊ ဘုတလင်၌
ယခင်ကြေးခေတ် ၊ သမိုင်းဖြစ်သည့်
ကျောက်ဖြစ်ရုပ်ကြွင်း ၊ စုပုံခင်းသည်
ဆောင်ကျဥ်းလေ့လာ ၊ ပညာရှာလော့ ။
ညောင်ကန်ရွာနီး ၊ မြို့ပျက်ကြီးတွင်
မင်းကြီးနာဂ ၊ ငိုချင်းချလျက်
နောင်တတစ်သက် ၊ ဘဝဖျက်သည့်
ရမ္မက်အာဏာ ၊ ချိုလှစွာက
တစ်ခါတောင့်တ ၊ စစ်မီးခပြီ
နာဂဒါသ ၊ ငရဲကျ ။
သြော်
အာဏာရမ္မက် ၊ ငမ်းငမ်းတက်သည့်
ရဲမက်ဗိုလ်ပါ ၊ အိမ်တော်ပါလည်း
အိမ်ယာလောင်မီး ၊ ကျသတည်း
မြို့ကြီးပျက်ကာသူ့ထီးတည်း ။ ။
ပျိုးကြဲလက်
ကဗျာရေးသားချိန် = ၂၀၂၂ ခုနှစ်၊ ဧပြီလ ၁၁ ရက် မွန်းလွဲ ၁ နာရီ ၄၅ မိနစ်
Thanlwin Myanmar Media
