0
0
ပေါက်မြို့မရဲစခန်းမှ ရဲတပ်သား တစ်ဦး လက်နက်ခဲယမ်းများနှင့်အတူ အလင်းဝင်
သံလွင်မြန်မာသတင်း
ဇန်နဝါရီလ ၁၂
မကွေးတိုင်း၊ ပေါက်မြို့မရဲစခန်းမှ ရဲတပ်သားတစ်ဦး လက်နက်ခဲယမ်းများ ယူဆောင်ပြီး အလင်းဝင် ခဲ့ကြောင်း ရေစကြိုမြို့နယ်ပြည်သူ့ကာကွယ်ရေးတပ်ဖွဲ့ – ပကဖ ထံမှ သိရသည်။
ဇန်နဝါရီလ ၁၀ ရက်နေ့က ပေါက်မြို့မရဲစခန်းတွင် တာဝန်ကျနေသော အသက် ၂၇ နှစ်အ ရွယ် ရဲ တသ အေးချမ်းအောင်သည် ပြည်သူ့ကာကွယ်ရေးတပ်ဖွဲ့ – ပကဖ ထံသို့ ဆက်သွယ်ကာ G3 အမျိုး အစား သေနတ် ၁ လက်၊ G3 ကျည်အတောင့် ၉၀ တို့နှင့်အတူ အလင်းဝင်ရောက်ခဲ့ခြင်း ဖြစ်ကြောင်း သိရသည်။
“သူက ၂၀၁၅ ခုနှစ်ကတည်းက ရဲထဲရောက်ပြီးပေါက်မြို့နယ်မှာ တာဝန်ကျတာ။ လွန်ခဲ့တဲ့ တစ်နှစ် လောက်ကတည်းက အလင်းဝင်ဖို့ဆက်သွယ်နေတာ၊အဆင်မပြေလို့ အခုမှ ကျနော်တို့နဲ့ချိတ်ဆက်မိ ပြီး အဆင်ပြေသွားတာ၊ သူတို့စခန်းမှာက ရဲဘက်နဲ့စစ်ဘက်နဲ့အဆင်မပြေကြဘူး။ စစ်သားတွေက ရဲတပ်ဖွဲ့ဝင်တွေကို နိုင့်ထက်စီးနင်းပြုကျင့်တာတွေက အကြိမ်ရေတွေများလာတယ်။ သူတို့မခံနိုင်တဲ့ အဆုံးလက်နက်နဲ့ထွက်ပြေးလာတာ” ဟု ရေစကြိုမြို့နယ်ပြည်သူ့ကာကွယ်ရေးတပ်ဖွဲ့ – ပကဖ မှ တာဝန်ရှိသူတစ်ဦးက ပြောကြားသည်။
ထိုသို့ လက်နက်ခဲယမ်းများနှင့်အတူ အလင်းဝင်ရောက်ခဲ့သူ ရဲတသအေးချမ်းအောင်ကို ဆုငွေ ကျပ် သိန်း ၃၀ ချီးမြှင့်ပြီး လုံခြုံသည့်နေရာသို့ ပို့ဆောင်ကာ ကောင်းမွန်စွာ ထိန်းသိမ်းစောင့်ရှောက် ထားကြောင်း သိရသည်။
အဆိုပါရဲတပ်သားအား ဘေးကင်းစွာခေါ်ဆောင်ပေးခဲ့သည့် နယ်မြေခံတပ်ဖွဲ့၊ ဂန့်ဂေါခရိုင်အမှတ် ၄ တပ်ရင်း မှ တာဝန်ရှိသူများကို အထူးကျေးဇူးတင်ရှိပါကြောင်း၊ ပြည်သူ့ရင်ခွင်သို့ ခိုလှုံကြမည့် စစ် ကောင်စီတပ်သားများအနေဖြင့် ယုံကြည်စိတ်ချစွာဆက်သွယ်နိုင်ကြောင်း အသိပေးထားသည်။
Thanlwin Myanmar Media
